تحدي علم النفس ~ اليوم الثالث

بعتذر اني ما عرفتش أكتب ال3 أيام اللى فاتوا بسبب انقطاع النت .. بس هعوضهم أن شاء الله 
اليوم الثالث: الخميس 19/3/2015
تحدي علم النفس
كتاب علم الشخصية - الجزء الأول - تأليف لورانس برافين

لو فاكرين المره اللى فاتت خلصنا المنحى العيادي واللى كان المنهج الأساسي بتاعه المشاهدة، وكان بيعتمد على مشاهده أو ملاحظة فرد واحد او مجموعة صغيرة من الأفراد... دلوقتي هنتكلم عن المنحى الإرتباطي..يلا بينا 

ثانيًا المنحى الإرتباطي: 

المنحى دا بيعتمد على القياس كمنهج أساسي ليه.. وبيعتمد على بيانات تم جمعها من مجموعة كبيرة من الأفراد، باستخدام مقاييس احصائية بيختلف اداء الافراد عليها، وبيهتم بدراسة الفروق الفردية بين البشر فى جميع المتغيرات .. وعلى عكس المنحى العيادي اللى بيهتم بوضع اطار عام للشخصية فهو يقوم بدراسة الارتباط بين عدد قليل من عناصر الشخصية .. زي مثلا دراسة الارتباط بين الطول والوزن ، أو الذكاء والتحصيل الدراسي. 

أول شخص هنتكلم عنه في المنحى الارتباطي هو:
 السير فرانسيس جالتون Sir Francis Galton

بدأ المنحى الارتباطي بعمل جالتون، فاكرين شاركو لما كان بيعمل بحوثه عن الهستيريا في نفس الوقت دا كان جالتون مشغول بدراساته الخاصة بالفروق الفردية ، والجدير بالذكر ان جالتون هو مؤسس علم النفس الفردي، جالتون كان متأثر باكتشاف داروين وبنظريته في التطور، عشان كدا اهتم انه يدرس الفروق بين البشر وهل الفروق دي ناتجه عن الوراثة ولا لا. 

عايزة افكركم ان المنهج اللى حطه جالتون واكد عليه هما 3 حاجات : الفروق الفردية، ومقاييس التقدير ( زي الاستبيانات والاستخبارات وكدا) ، وعدد كبير من المشاركين أو العينة.

والجدير بالذكر برضو ان ال3 حاجات دول هما اهم 3 خصائص فى المنحى الارتباطي في دراسة الشخصية لحد دلوقتي.

جالتون اهتم بدراسة وراثة القدرات العقلية، وكان بيعتقد ان القدرات العقلية موروثة يعني مثلا لو انت عندك ارتفاع فى الذكاء يبقى اكيد دا راجع ان والديك مرتفي الذكاء برضو.. 

وجالتون برضو ابتكر مصطلح معامل الارتباط أو القياس الكمي للتصاحب الاحصائي 
بعد كدا جه تلميذه كارل بيرسون karl pearson

طور بيرسون شغل جالتون وعمل معامل ارتباط بيرسون المعروف، بعد كدا جه العالم تشارلز سبيرمان Charles Spearman

وكمل شغل جالتون في قياس القدرات العقلية، واهتم اكثر بأنه يحدد اذا كان فيه حاجه اسمها ذكاء عام؟؟ ولا الفروق في الذكاء بترجع للفروق في قدرات متعددة مستقلة ومعزولة عن بعضها؟ وعشان يجاوب على السؤال دا طبق عدد كبير من اختبارات القدرات العقلية على مئات الأفراد وبعد كدا حسب معاملات الارتباط بين درجات الافراد على الاختبارات دي.. ومن خلال الاجراءات دي وصل انه فعلا فيه حاجه اسمها ذكاء عام او G factor.. وخلال شغله دا قدر يعمل اسلوب احصائي مشهور جدا اسمه التحليل العاملي factor analysis ..وبعد كدا بقى التحليل العاملي هو اسلوب اساسي في المنحى الارتباطي للشخصية.

كدا وصلت لنهاية التدوينة والمره الجاية نكمل باقي المنحى الارتباطي.

تحدي علم النفس ~ اليوم الثاني

اليوم الثاني: الأحد 15/3/2015

تحدي علم النفس

كتاب علم الشخصية - الجزء الأول - تأليف لورانس برافين 

نكمل بقية  المنحي العيادي .. 

أول شخصية هنتكلم عنها هو كارل روجرز Carl Rogers

روجرز كان عنده نظره مختلفة شوية عن كل العلماء اللى اتكلمنا عنهم المره اللى فاتت .. حركة روجرز النظرية كان اسمها الامكانات البشرية وفيها بيجمع بين وجهتين من النظر الأولى خاصة بالتحليل النفسي اللى اتكلمنا عنه المره اللى فاتت وإللى بيهتم أكتر بالإنسان وباللاشعور وشايف ان الخبرات اللى مر بيها الانسان  ومشاعره تجاهها هي اللى بتكون شخصيته، أما وجهة النظر التانية هي النظرية السلوكية يمكن هنتكلم عنها بس لسه قدام شوية بس باختصار الوجهة دي من النظر شايفة ان الانسان مجرد مستجيب للمدعمات الخارجية او الميثيرات الخارجية .. وبكدا قدر روجرز انه يطلع بحاجه جديده مكانتش موجوده قبل كدا .. وحده الشخصية عنده هي (الذات) ووازاي الشخص بيحاول يحقق ذاته ويبنيها .. اهتمام روجرز في المقام الأول كان بمشاعر الشخص وانه يطلع كل اللى جواه وانه يربط بين الاحداث وبين مشاعره ومن خلال دا يقدر يسلك بطريقه أفضل وبالتالي يحقق ذاته .. الجدير بالذكر أن كارل روجرز ومنحاه فى العلاج النفسي اتسمى بعد كدا بالارشاد النفسي .. لأنه كان مهتم أكثر بالأشخاص النورمال او الطبيعين.. 

الشخصية التانية هو شبه روجرز واخدوا الدكتوراه في نفس السنه 1931.. الشخصية دي هو جورج كيللي Gorge Kelly

كيللي كان مهتم أكتر بالتكوينات المعرفية للشخص يعني بيفكر ازاي .. كيللي كان بيعتبر الشخص أنه عالم ولازم يكون واعي بكل ما يحيط بيه وان المرض النفسي بيكون نتيجه ان التكوينات المعرفية دي مبينه بشكل غلط او غير طبيعية .. هما بيقولوا ان نظريته معقده شويتين وانا شايفه كدا برضو .. بس لازم اذكر انه كان زي فرويد من حيث ان نظريته ماولدتش فروض كتير بس بناءا على تظريته اتعملت نظريات كتير عشان تغلطه Lol .. 

كدا انا خلصت كل شخصيات المنحى العيادي بس فاضل حاجه واحده هتكلم عنها وهي تقييم المنحى دا : 

طبعا المنحى العيادي قائم على المشاهدات العيادية بنسبة 99% .. بس مشكلة الطريقة دي من منهج الملاحظة .. اننا زي ما قولنا قبل كدا مش هنعرف نتأكد اذا كان اللى شافه فرويد او روجرز مثلا انه صح .. لان مافيش حد شاف الكلام دا غيرهم هما الاتنين مثلا .. معنى دا مثلا اننا بنحاربهم وبنقول انهم مش موضوعيين .. وانهم ما بيفهموش فى المنهج العلمي وخطواته .. لا هما كانوا علماء قبل ما يدخلوا مجال علم النفس .. مثلا فرويد كان عالم بيولوجي قبل ما يكون محلل نفسي .. وكمان وموراي كان باحث كيميائي قبل مايكون باحث نفسي.. بس اللى اقصده انهم كانوا مقتصرين على المشاهده الذاتيه بس من غير ما يحطوا فروض ويحاولوا يثبتوها بالمنهج العلمي .. مش معنى كدا انه منهج نرميه وما نشتغلش بيه .. بس الفكره كلها اننا نستخدم مناهج تانيه معاه .. ودا اللى هنوضحه المره الجاية مع المنحى الارتباطي .. 

وصلت كدا لنهاية التدوينة .. يادوب الحق انزل الكلية اشوفكم المره الجاي ..

سلاااام ^^

تحدي علم النفس ~ اليوم الأول

اليوم الأول السبت 14/3/2015 

# تحدي علم النفس 

كتاب علم الشخصية - الجزء الأول ــ تأليف لورانس برافين 

علم الشخصية بيواجهه تحدي كبير هو ازاي على الرغم من الاختلاف بين الأشخاص وكمية التعقيدات في سلوك الإنسان هيعرف علماء الشخصية انهم يحيطوا بكل الاختلافات والتعقيدات دي؟؟ لا والاصعب كمان انهم مش بس بيحيطو بيها لا كمان انهم يعملوا قوانين عامه تنطبق على جميع البشريه؟؟  

دا بس سؤال كدا على الماشي عشان نعرف المعاناه اللى واجهها علماء الشخصيه لعمل نظريات تفسر شخصية الانسان.. بادئ ذي بدئ .. مكنتش اعرف تاريخ علم نفس الشخصية ايه ومكنتش اعرف هي بدأت امتى وازاي .. بس قبل ما نعرف تاريخ علم الشخصيه ايه نعرف الاول ان علم النفس أصلا بدأ فى اواخر القرن التاسع عشر يعني اخر 1800م، أما بقى علم الشخصية فهو علم حديث شويتين بدأ فى ثلاثينيات القرن العشرين يعني حوالى 1930م، وبالظبط التاريخ اللى ممكن نقول انه بدأ الاعتراف بعلم النفس الشخصية كفرع مستقل من فروع علم النفس كان على ايد اولبورت Allport سنه 1937 لما ألف كتابه ( الشخصية: تفسير نفسي).

ندخل بقى على بدايات علم الشخصية: 

أول حاجه لازم نعرفها ان المنهج المستخدم في دراسات علم النفس الشخصية هو الملاحظة المنظمة للأداء الأنساني .. بالبلدي يعني ملاحظة سلوك الانسان بشكل منظم والاهم من الملاحظة ان اي شخص تاني يعرف يشوف السلوك دا كمان ما يكونش واحد بس شاف حاجه والباقيين لا.. 

ليه انا بوجع دماغكم بالمنهج المستخدم دا .. عشان اقولكم الاساس اللى بتختلف على أساسه نظرية عن التانية بيكون بسبب اختلاف الطريقة اللى بيتم بيها مشاهده السلوك ..عشان كدا هتلاقي في نظريات كتييييييييير جدااا كل واحده بتفسر السلوك بمزاجها وبالطريقة اللى تعجبها.. 

كل اللى فات دا حمادة واللى جاي حماده تاني خااالص  .. اي حد بيتوه فى الاسماء زيي يا ريت يركز .. مستقبل الشخصيه كله ف ايديك Lol ..

بالصلاه على النبي كدا احنا عندنا 3 مناحي تقليدية في دراسة الشخصية .. 

اول منحى هو المنحى العيادي 

التاني هو المنحى الارتباطي 

والتالت هو المنحى التجريبي

طبعا مش هعرف اتكلم عن ال3 مناحي في تدوينه واحده والا هتعتبر موسوعه مش تدوينه Lol..

هتكلم عن أول منحى بشكل مختصر 

هتكلم عن 6 اشخاص في عين العدو كدا .. ودول من اهم الأسماء في تاريخ المنحى العيادي.. 

أول واحد اسمه جان شاركو Jean Charcot ..

الراجل دا طبيب فرنسي عنده عيادة في باريس .. وكعادة كل علماء الشخصية لاحظ ان مرضى الهستريا اللى بيترددوا على عيادته كان عندهم أعراض من نوع مثلا انه يكون مشلول في ايدة مع انه خالى من اي مشكلات عضوية ممكن تسبب الشلل دا .. أو يكون اعمى مثلا ومعندوش اي مشكلة في الابصار .. فكر كدا في سؤالين وحاول انه يجاوب عليهم وعشان يدور على اجابه للسؤالين دول استخدم التنويم الصناعي ( فكروني ابقى ادور عليه عشان مش عارفه الفرق بينه وبين التنويم المغناطيسي ).. المهم أول سؤال كان هل المرضى دول عندهم مشكلات عضوية بيرجع ليها الاعراض دي ؟؟ وكانت الاجابة (لا).. والسؤال التاني  هل المرضى دول بيكذبوا .. بيحوروا عليه يعني؟؟ وبرضو كانت الاجابة (لا).. لحد هنا وعم شاركو بطل

كمل مشواره العلمي 3 من تلاميذه 
أولهم هو الأخ بيير جانيه Pierre Janet

 عمنا جانيه كمل شغل استاذه شاركو بس اكتشف حاجه غريبه جدا وهو بيعمل تنويم صناعي لأحد مرضى الهستريا .. لقي انه لما المريض بيكون منوم صناعيا بيقول حاجات وهو واعي مابيكونش فاكرها او واعي ليها اصلا.. من هنا افترض أن المرضى دول عندهم حالة من الانفصام في انماط الوعي.. يعني بيكون عنده افكار ثابته مفككة ومالهاش علاقه ببعض.. وبسبب التفكك دا المريض ما بيعرفش يتحكم في الحاجات اللى واعي بيها .. يعني مثلا لو المريض عنده شلل هستيري فى ايده الشلل دا بيكون تحت تحكم فكرة ثابته ومش تحت التحكم الاراداي أو الواعي.. حد فهم حاجه ؟؟ 

المهم التلميذ التاني كان مورتن برنس Morton Prince ..

البرنس باشا كان مهتم بمرضى اضطراب تعدد الشخصية.. وازاي ان المريض بيكون عنده كذا شخصية وهو مش واعي بأي واحده منهم .. الطريف في التساؤل دا ان احنا كأشخاص طبيعين مش مرضى عندنا نفس المشكلة بس على مستوى شخصيتنا .. مثلا بيكون عندك رغبه انك تنظم اكلك عشان وزنك .. بس فى نفس الوقت بتاكل بشكل مفزع .. دا سببه على رأي البرنس باشا انه جزء من الشخصية بتدخل في رغبات جزء أخر .. ماعلينا دا كلام كفار مالناش دعوة بيه ..

نيجي لحبيب الملايين واللى اي حد يقول علم نفس يجيب سيرته على طول اكأنه هو اللى عمل علم النفس ..
الأخ الكبير سيجموند فرويد Sigmund Freud..

الباشا فرويد صاحب النظرية الاشهر من نار على العلم نظرية التحليل النفسي .. طبعا مش هحكيلكم عن اسهاماته لانها معروفه على نطاق كبير .. ولا هتكلم فى تفاصيل .. كفايه اقولكم ان علم النفس كله اتعمل عشان يرد على نظرية فرويد .. من الاخر كدا عشان يغلطوها ويرموها فى اقرب سله للمهملات .. بس الحق يقال ان الاخ فرويد كان عبقري في طريقته للملاحظة يعني فى المنهج اللى قامت عليه النظرية بتاعته .. يعني مثلا هو كان بيقعد مع المريض اللى نايم على الشيزلونج يجي ساعه وشويه ويقوله فضيلي كل اللى جواك .. على الرغم من عبقريته فى ربط كلام المريض والاستنتاج منها الا ان نظريته اتهاجمت كتير عشان مش متأكدين من صحة الكلام اللى المريض قاله .. 

عشان كدا جه بعده عمنا موراي ( هنري موراي Henry Murray)

وراح عمل حته اختبار اسمه تفهم الموضوع (TAT) فكرة الاختبار دا انه عنده شويه بطاقات كل بطاقة عليها منظر مش واضح غامض يعني مثلا ولد ماشي بعيد عن ست عجوزة وبيطلب من المشارك انه يألف قصه على المنظر دا ..طبعا هو ذكي كدا فى فكرته دي لانه افترض ان القصة اللى هيحكيها المشارك هتكون 99 % منها من وحي خياله .. لان البطاقه المعلومات اللى بتديها مش كتيره .. بيقولك بقى انه افترض ان القصة دي هتعكس احتياجات الشخص ورغباته ومخاوفه يعني الشخص هيسقط كل الحاجات دي على المنظر اللى شافه .. وطبعا لا يخفى عليكم ان الطريقة دي اسمها الاختبارات الاسقاطية.. 

كدا انا خلصت الجزء اللى قرأته النهارده فى أول يوم من التحدي .. وجبت اخرى عايزة اناااام ..

اشوفكم بكرا مع باقي حكاية المنحى العيادي .. تصبحوا على خير ^^

تحدي علم النفس ~ 40 يوم!

النهاردة يوم مش عادي .. قررت  ابدأ اخد موضوع دراستي بشكل جد هزار .. يعني انا بحب علم النفس وعلى الرغم من كدا مش عارفه استمتع بيه :( .. قالوا زمان لو بتحب حاجه ادرسها واشتغل فيها لانك هتستمتع بيها ومش هتحسها عبء عليك .. طبعا فى حالتي العكس تماااما .. بما اني بحب الرومانسية والحب.. قررت اعمل رسالة الماجستير بتاعتي عن أساليب الحب وبالرغم من كدا دلوقتي انا مش طايقه اقرا او اتفرج على حاجه عن الحب  ( ايموشن تنهيده كبيرة) .. وعشان اللى جانيته مما كسبت يداي .. قررت ارجَّع تاني شغفي بعلم النفس والابحار فى مياهه التي لا تنتهي .. عشان كدا قررت اعمل تحدي 40 يوم ابتداءًا من النهارده .. هرجع اقرا تاني في علم النفس واكتب هنا كل يوم اللى اتعلمته من قراءاتي.

تحدي علم النفس
التحدي: قراءة كتاب علم الشخصية (الجزء الأول) ــ  تأليف لورانس برافين

مدته: 40 يوم

ابتداءًا من السبت 14/3/2015

انتهاءًا يوم الاربعاء 22/4/2015

:) !Wellcome in my world